काठमाडौं (अस) । विद्युतीय गाडीको चार्जिङ सहज बनाउने उद्देश्यले अटो निर्माता हुन्डाईले नेपालका मुख्य शहरका ४० ठाउँमा चार्जिङ स्टेसन स्थापना गरेको छ । विद्युतीय गाडी प्रयोगकर्तालाई लामो यात्रामा निस्कँदा ब्याट्री चार्ज गर्न समस्या नहोस् भनेर कम्पनीले देशका विभिन्न शहरमा चार्जिङ स्टेसन स्थापना गरेको हो ।
हुन्डाईले बागमती प्रदेशका काठमाडौं, भक्तपुर, ललितपुर, हेटौंडा, चितवन लगायत १४ स्थानमा चार्जिङ स्टेसन स्थापना गरेको जानकारी दिएको छ । प्रदेश १ का ५ स्थान, मधेश प्रदेशको वीरगञ्जका २ स्थान, गण्डकी प्रदेशको पोखराका ५ स्थान, लुम्बिनी प्रदेशको दाङ, नेपालगञ्ज, भैरहवा र बुटवलका ८ स्थानमा चार्जिङ स्टेसन खोलिएको छ । त्यसैगरी, सुदूरपश्चिम प्रदेशको धनगढी र चिसापानी कर्णालीमा पनि चार्जिङ स्टेसन राखिएको जानकारी दिइएको छ ।
कम्पनीले चार्जिङ स्टेसन राखेका होटल, रेस्टुरेन्ट, शपिङ मलहरूले विद्युतीय गाडी चार्ज गरेबापत प्रतियुनिट १२ देखि १५ रुपैयाँ शुल्क लिने बताइएको छ । नेपालका लागि हुन्डाई मोटर्सको आधिकारिक विक्रेता लक्ष्मी इन्टरकन्टिनेन्टल प्रालिले शुक्रवार अटोमोबाइल क्षेत्रमा कार्यरत पत्रकारलाई ललितपुरको पाटन औद्योगिक क्षेत्रमा रहेको हुन्डाई तालिम केन्द्रमा विद्युतीय सवारी साधन प्रयोगका फाइदा, त्यसका चुनौती, नेपाल लगायत विश्वभर यसको बढ्दो प्रयोगबारे जानकारी दिएको छ ।
कार्यक्रममा हुन्डाई ट्रेनिङ एकेडेमीका वासुदेव तिमिल्सिनाले पछिल्लो समय विश्वमा बाक्लो जनघनत्व भएका अधिकांश ठूला शहरमा वायुप्रदूषणको मात्रा उच्च रहेकाले विद्युतीय गाडीको प्रयोग बढाउनुको विकल्प नरहेको बताए । काठमाडौं शहर पनि विश्वको प्रदूषित शहरको सूचीमा अगाडि नै रहेकाले गाडी प्रयोगकर्ताले यसमा ध्यान दिनुपर्ने उनको सुझाव छ । विद्युतीय गाडी प्रयोगले अहिले विश्व बजारमा देखापरेको इन्धन संकटबाट जोगाउने भएकाले यसको प्रयोग आउँदा दिनमा झनै बढ्ने अपेक्षा गरिएको छ ।
