बागलुङ । बागलुङको गलकोट नगरपालिकामा रहेको एक दुर्गम स्वास्थ्य इकाइमा अक्सिजनसहितको स्वास्थ्य सेवा उपलब्ध भएपछि स्थानीय हर्षित बनेका छन् । गलकोट–४ मा रहेको स्वास्थ्य इकाइमै अक्सिजनसहितको सेवा सुरु गरिएको हो ।
गाउँघर क्लिनिकबाट स्तरोन्नति भएको बौर सामुदायिक स्वास्थ्य इकाइमा अक्सिजन सेवा सुरु भएको नगरपालिकाले जनाएको छ । सामान्य भवनमा सञ्चालनमा रहेको स्वास्थ्य इकाइमै अक्सिजन व्यवस्थापन भएपछि वडाबासीलाई राहत मिलेको छ ।
सीमित जनशक्तिमा चल्दै आएको उक्त स्वास्थ इकाइका लागि सुविधासम्पन्न भवन बनिसके पनि केही काम बाँकी छ ।
वडाध्यक्ष बलबहादुर खत्री र नरेठाँटी स्वास्थ्य चौकीमा कार्यरत हेल्थ असिस्टेन्ट जगन्नाथ सुवेदीको पहल र दाताको सहयोगमा गाउँमै अक्सिजनसहितको सेवा सुरु गरिएको हो ।
डा. डिलबहादुर थोकर लामाले वोधिसत्वा विहारसँगको सहकार्यमा स्वास्थ्य इकाइलाई अक्सिजन मेसिन उपलब्ध गराएका छन् । रासस