१२ वैशाख २०७२ को भूकम्पले ध्वस्त बनाएको नौतले धरहराको २१ तलाको ढलान सकिएको छ। पुरानो धरहराको भग्नावशेषलाई त्यहीँ राखेर नजिकै २२ तले नयाँ धरहरा बन्दै छ।
भुइँतलासहित २४ तला हुने धरहराको अन्डरग्राउन्डमा रहेको डबल बेसमेन्टको काम सम्पन्न भई ट्रिपल बेसमेन्टको काम पनि आधा सकिएको छ । जसमा चार सयवटा सानो गाडी र सात सयवटा मोटरसाइकल पार्किङ गर्न मिल्नेछ । लिफ्ट राख्ने काम पनि सुरु भएको छ ।
दुई वर्षमा निर्माण सम्पन्न हुने गरी २०७५ मा रमन कन्स्ट्रक्सनसँग सम्झौता भएको थियो । सोही वर्षको कात्तिकदेखि कन्स्ट्रक्सनले काम सुरु गरेको थियो । तर कोरोनाका कारण काम प्रभावित भएपछी गत असोजमा राष्ट्रिय पुनर्निर्माण प्राधिकरणले नौ महिना समय थप गरिदिएको थियो ।
२२ टुक्रामा परिणत भएको गजुरलाई पनि पहिलाकै जस्तै बनाउन गत सोमबारदेखि काम थालिएको छ । जुन गजुरमा सुनको जलपसमेत लगाइनेछ ।
१८८२ सालमा तत्कालीन प्रधानमन्त्री भीमसेन थापाले धरहरा निर्माण गरेका थिए । उनले महारानी त्रिपुरासुन्दरीदेवीको सम्झनास्वरूप यो स्मारक निर्माण गरेको भनाइ छ । त्यतिवेला ११ तलाको धरहरा १९९० सालको भुइँचालोमा भत्केको थियो । त्यसपछि नौ तला पुनर्निर्माण गरिएको हो ।
