वरिष्ठ पत्रकार बनारसी वर्माको नाममा कपिलवस्तुमा अक्षयकोष स्थापना

केरसिंह अदै, कपिलवस्तु । नेपाल पत्रकार महासंघ कपिलवस्तु को १० औं साधारण सभा आज तौलिहवामा सम्पन्न भएको छ । नेपाल पत्रकार महासंघका केन्द्रीय उपाध्यक्ष विपुल पोख्रेलको प्रमुख आतिथ्यता र महासंघ कपिलवस्तुका अध्यक्ष दिलाराम भुसालको अध्यक्षतामा कार्यक्रम सम्पन्न भएको हो । त्यस्तै, नेपाल पत्रकार महासंघका केन्द्रीय सचिव तथा प्रगतिशील पत्रकार संघका अध्यक्ष उदय जिएम, पूर्व कृषि मन्त्री बलदेव खनाल, पत्रकार महासंघ केन्द्रीय सदस्य वसन्त गिरी, पूर्व केन्द्रीय सदस्य निशा विश्वकर्माले पनि सम्बोधन गर्नु भएको थियो । प्रेस युनियन, प्रेस संगठन, प्रगतिशील पत्रकार संघ, मधेसी पत्रकार समाजका प्रतिनिधिहरुले सम्मेलन सफलताको शुभ कामना दिनु भएको थियो । सम्मेलनमा सचिव हरी आचार्यले प्रगति प्रतिवेदन, कोषाध्यक्ष दीपक खड्काले आर्थिक प्रतिवेदन तथा महासंघका जिल्ला अध्यक्ष दीलाराम भुसालले आर्थिक वर्ष २०७७–७८ को लागि योजना तथा कार्यक्रम प्रस्तुत गर्नु भएको थियो । सम्मेलनले कोरनाका कारण मृत्यु हुनु भएका वरिष्ठ पत्रकार शाखाका पूर्व उपाध्यक्ष बनारसी बर्मा प्रति शोक प्रस्ताव पारित गर्दै उहाँ प्रति श्रद्धाञ्जली अर्पण गरेको छ । साथै उहाँको नाममा १ लाख रुपैयाँको अक्षय कोष खडा गर्ने निर्णय समेत गरेको छ । बर्माको उपचारमा पनि महासंघले सहयोग गरेको थियो। महासंघ कपिलवस्तु शाखाले पत्रकारहरुलाई आपत विपतमा सहयोग गर्ने हेतुले ६ लाख रुपैयाँ बराबरको अक्षय कोष समेत खडा गरेको छ । आगामी वर्ष १५ लाख पुराइने घोषणा गरिनुका साथै जिल्ला मा ९० जना पत्रकार हरुको कोरोना बीमा बनाई सकेको छ । जिल्लामा १४६ जना पत्रकार महासंघमा आवद्ध रहेका छन् । शाखाको १० औं साधारण सभाले विभिन्न माग राखी १० बुँदे घोषणा पत्र समेत जारी गरेको छ । जिल्लाको विविध समस्यालाई लिएर प्रमुख अथिती पोख्रेललाई लिखित रूपमा ध्यानआकर्षण पत्र पनि बुझाइएको छ ।  सभाको सञ्चालन सचिव हरी अधिकारी र स्वागत, महासंघकी उपाध्यक्ष पार्वती पाण्डेले गर्नु भएको थियो ।