काठमाडौं । काठमाडौंको नक्सालमा रहेको काठमाडौं मेरियटले रात्रिकालीन कार्यक्रम आयोजना गर्ने भएको छ । होटलले आगामी शुक्रवार गर्न लागिएको उक्त कार्यक्रमको नाम ‘अण्डरग्राउण्ड ग्यारेज पार्टी’ दिइएको बताइएको छ । ‘कार्यक्रममा सहभागीले रात्रिकालीन जीवनका अद्भुद् दृश्यको मजा र अविस्मरणीय तथा नौलो अनुभव लिन सक्छन्,’ कम्पनीद्वारा जारी विज्ञप्तिमा भनिएको छ । देशकै चर्चित डिजेहरूको प्रस्तुति रहने कार्यक्रममा बीपीएम, वाईएनजेडएन, ओ मान्सी लगायतका डिजेहरूले मनोरञ्जन दिने बताइएको छ ।
विभिन्न किसिमका पेय पदार्थको समिश्रणमार्फत ककटेल स्वाद समेत दिलाइने होटलका क्लस्टर जनरल म्यानेजर विशाल मेहराले जानकारी दिए । उनका अनुसार यस कार्यक्रममा जो कोहीले सहभागी हुन सक्नेछन् । सीमित टिकट रहेको कार्यक्रममा सहभागिताका लागि प्रतिव्यक्ति ९९९ रुपैयाँमा टिकट बुक गर्न सकिने बताइएको छ । सो शुल्कमा एउटा वियर समेत उपलब्ध हुने होटलको भनाइ छ । साथै कार्यक्रममा भीआईपी प्याकेज समेत उपलब्ध गराइएको क्लस्टर जनरल म्यानेजर मेहराले जानकारी दिए । यो ७५ हजार रुपैयाँबाट शुरू हुने बताइएको छ, जसमा ६ जना ग्राहक सहभागी हुन सक्नेछन् ।
